lantschament da campagna

2xGea per aua netta, terrens fritgaivels e per nossa sanadad

Berna, ils 24 da mars 2021 – L’iniziativa per aua da baiver netta e l’iniziativa per ina Svizra senza pesticids mussan vias per dar dumogn a las grondas sfidas da l’agricultura dad oz. Ellas dattan ils temps transitorics e la segirezza da planisaziun ch’i dovra per realisar in’agricultura svizra sociala en accord cun la natira, da la quala nus tuts profitain, betg mo l’economia agrara.

Perquai lantscha oz in vast comité cun participaziun da la populaziun ina campagna naziunala che recumonda da votar 2xGea. Ils 13 da zercladur 2021 han las votantas ed ils votants svizzers la schanza da prender decisiuns impurtantas davart la politica agrara: cun metter la basa per in’agricultura ecologica, ina natira intacta e vivondas saunas – u cun sustegnair vinavant in’agricultura che tissienta nossas auas e noss terrens. L’iniziativa per ina Svizra senza pesticids sintetics e l’iniziativa per aua da baiver netta han finamiras cuminaivlas cun modas da proceder differentas: proteger l’ambient, promover en general la varietad dals insects e da las spezias e garantir la producziun da vivondas saunas oz ed en l’avegnir. Tuttas duas iniziativas vulan in’agricultura per las puras ed ils purs e per las consumentas ed ils consuments – ma era per l’ambient e la diversitad da la natira.

Finì cun utilisar tants pesticids, tanta antibiotica e tant ladim

Il parlament ha sistì la refurma da la politica agrara svizra ed impedì uschia l’agricultura onns a la lunga da sa sviluppar a moda pli ecologica e sauna. Las duas iniziativas èn in pass necessari en la dretga direcziun. Cun in dubel gea pudess ins reducir ils pesticids toxics en l’ambient e franar il diever exagerà d’antibiotica e da ladim. Ultra da quai pudess la Svizra sa profilar sco pioniera d’ina agricultura persistenta e d’auta qualitad.

Las duas iniziativas permettan d’adattar ad uras la scienza, la perscrutaziun e la pratica a las midadas planisadas. L’agricultura intensiva è numnadamain sfurzada d’agir cun u senza las iniziativas: la muria dals insects, la polluziun da l’aua, il terren adina damain fritgaivel ed il clima che sa mida svelt èn problems che na sa laschan betg ignorar e che pretendan midadas en l’agricultura.

Crear segirezza da planisaziun

A medem temp sa reducescha la toleranza da la societad envers ils pesticids e lur restanzas en l’aua da baiver ed en las vivondas. Schizunt concerns sco Syngenta quintan ch’i vegnian utilisads en diesch onns bler damain pesticids che oz. Las iniziativas creeschan segirezza da planisaziun e pussibiliteschan cun ils lungs termins transitorics (8-10 onns) ina midada socialmain cumpatibla che prenda resguard da tuts e lascha temp avunda per s’adattar a las novas circumstanzas.

Campagna 2xGea

Oz lantscha in vast comité la campagna 2xGea. Quel sa cumpona da WWF Svizra, Greenpeace, Pro Natura, Aqua Viva, Medias e medias per la protecziun da l’ambient, BirdLife Svizra e la Federaziun svizra da pestga.